Нұрмаханбетов Арман Лесханұлы – әл-Фараби атындағы Қазақ ұлттық университетінің «Психология» мамандығы бойынша түлегі, психология ғылымдарының докторы. 2002–2023 жылдар аралығында Қазақстан Республикасының ұлттық қауіпсіздік органдарында және Бас прокуратурасында қызмет атқарған. Қызмет барысында құқық қорғау және ұлттық қауіпсіздік органдарының қызметінде полиграфологиялық және психологиялық қамтамасыз етудің тиімді үлгілерін енгізді. Қазақстан Республикасының құқық қорғау органдарының 2014–2018 жылдарға арналған кадр саясаты тұжырымдамасын және 2014–2020 жылдарға арналған құқық қорғау жүйесін одан әрі жаңғыртудың мемлекеттік бағдарламасын іске асыру жөніндегі іс-шаралар жоспарының «Кадр саясатын және ведомстволық білім беруді жаңғырту» бөлімін әзірлеуге және іске асыруға басшылық етті. 2016 жылы құқық қорғау органдары басшыларының Президенттік кадр резервін даярлау, бастапқы оқыту және біліктілікті арттыру жүйесіне инновациялар енгізіп, кадрларды даярлаудың нысаналығын, практикалық бағыттылығын және тиімділігін қамтамасыз етті. Күштік құрылымдардың қызметін психологиялық қамтамасыз ету мәселелері бойынша ғылыми әлеуетті қалыптастыруға белсенді атсалысты: оның жетекшілігімен 10-нан астам ғылым кандидаты мен докторы дайындалды, 100-ден астам ғылыми еңбек жарияланды; 2009–2010 жылдары докторлық диссертацияларды қорғау жөніндегі диссертациялық кеңестің төрағасы болды. Қазіргі уақытта «Цифрлық ойлау психологиясы және адамның жасанды интеллектпен өзара іс- қимылы» атты ғылыми бағытты дамытып келеді. Бұл бағыт цифрлық ортаның тұлғаны дамыту, цифрлық агенттілік пен метатанымды қалыптастырудағы әлеуетін эмпирикалық тұрғыда зерттеуге және практикалық тұрғыдан ашуға бағытталған. Негізгі ғылыми қызығушылықтары: адамның жасанды интеллектпен өзара әрекеттесу психологиясы, цифрлық өзін-өзі реттеу және когнитивтік икемділік, әлеуметтік желілердегі цифрлық ықпал психологиясы, цифрлық бейімделу мен психологиялық әл-ауқат, цифрлық ортаның нейропсихологиясы.